ТОШКЕНТ, 15 май — Sputnik. Концертга чиптани мажбурлаб сотган мактаб директори лавозимидан озод этилди. Бу ҳақда Халқ таълими вазирлиги ахборот хизмати хабар қилди.
Қайд этилишича, Қашқадарё вилояти халқ таълими бошқармаси, Қарши шаҳар халқ таълими бўлими раҳбарияти, умумтаълим мактаблари директорлари ҳамда концерт дастури ташкилотчилари шахсий манфаатларини кўзлаб педагог-ходимларни мажбурий равишда концертга жалб қилганликлари аниқланган.
Жумладан, Қарши шаҳри ХТБ тасарруфидаги 23-сонли умумтаълим мактаби директори в.в.б. Р.Н ва 19-сонли умумтаълим мактаби директори С.А 35 000 сўмлик ҳар бир чипта сотувидан 5000 сўмдан ўзларига қолиши борасида концерт ташкилотчиси билан ўзаро келишган. Сўнгра 100 дона концерт чиптасини ўқитувчиларга мажбуран сотишган.
Маълум бўлишича, ҳуқуқий-назорат хизмати ходимларининг аралашувидан сўнг мактаб директорлари шу кунгача ўқитувчиларга сотилган концерт чипталари пулларини қайтариб беришган.
“Юқорида қайд этилган ҳолатлар юзасидан Қарши шаҳар ХТБ мудири ўринбосари Р.Жга ҳайфсан интизомий жазо чораси берилди. 23-сонли умумий ўрта таълим мактаби директори в.в.б. Р.Н эгаллаб турган лавозимидан озод этилди. 19-умумтаълим мактаби директори С.А. жорий йилнинг 8 майидан буён соғлиғи яхши эмаслиги туфайли даволанаётгани боис унга нисбатан интизомий жазо чораси кўриш кейинга қолдирилган”, - дейилади хабарда.
Шунингдек, ҳозирда Қашқадарё вилояти халқ таълими бошқармаси бошлиғи ўринбосари Б.У. ва Қарши шаҳар халқ таълими бўлими мудири Б.Э.га интизомий жазо бериш масаласи кўрилмоқда.
