ТОШКЕНТ, 16 апр - Sputnik. Украина Олий рада депутати, Украина қаҳрамони Надежда Савченко қамоқдан озод қилинди. Бу ҳақда РИА Новости хабар қилмоқда.
Хабарда келтирилишича, Укранинанинг Броварский шаҳри туман суди Савченкони озодликка чиқариш тўғрисида қарор чиқарган. Таъкидланишича, 16 апрелга ўтар кечаси унинг ҳибсда ушлаб туриш муддати тугаган.
Шунингдек, “Зобитлар корпуси” ташкилоти раҳбари Владимир Рубан ҳам шу қарор билан қамоқдан озод қилинган.
“Мен бу залдан эркин одамдек чиқяпман. Мен эркинлигимни қайтариб олдим ва Украина учун курашаман. Бу судда айбсиз эканлигимни исботлайман”, - деган Савченко.
Украина Бош прокуратурасига кўра, Савченко Владимир Рубан билан биргаликда парламент биносида теракт уюштиришни режалаштирган. Уларга беш йилдан то умрбод озодликдан маҳрум қилиш жазаси тайинланиши мумкин.
Эслатиб ўтамиз, аввалроқ Надежда Савченко Украина халқини "қари сиёсатчилар" учун овоз бермасликка чақирган эди.
Қайд этиш жоизки, Украина президенти сайловларининг иккинчи тури 21 апрель куни ўтказилади. Унда Украина президенти Пётр Порошенко ва биринчи турда амалдаги президентга нисбатан икки марта кўпроқ овоз тўплаган Владимир Зеленский қатнашади. Надежда Савченко ўзининг Порошенкога қарши фикрлари билан барчага маълум. Бироқ ҳуқуқшуносларнинг таъкидлашича, Савченконинг озодликка чиқарилиши президент сайловларига боғлиқ эмас. Чунки қонун нуқтаи назаридан ҳақиқатдан ҳам уни ҳибсда ушлаб туриш муддати тугаган.
