ТОШКЕНТ, 19 мар - Sputnik. Ўзбекистон миллий терма жамоаси 21-25 март кунлари ўтказиладиган "China Cup-2019" мусобақасида иштирок этиши учун Хитойга етиб келишди. Бу ҳақда ЎФА хабар қилмоқда.
Ўзбекистон терма жамоа аъзолари Тошкент-Пекин-Наннинг йўналиши бўйлаб салкам 9 соат парвоздан сўнг манзилга етиб келишди.
Делегация аъзоларини аэропортда ташкилотчилар ва маҳаллий ОАВ ходимлари жуда илиқ кутиб олишди. Терма жамоа Наннинг шаҳридаги "Wanda REALM Resort" меҳмонхонасига жойлашди.
Бугун маҳаллий вақт билан соат 19:00да Хитойдаги дастлабки машғулот ўтказилиши режалаштирилган, дейилади хабарда.
Эслатиб ўтамиз, "China Cup-2019" халқаро мусобақасида Ўзбекистон, Уругвай, Хитой ва Тайланд терма жамоалари куч синашади. Ўзбекистон мусобақани 22 март куни Уругвай терма жамоасига қарши ўйин билан бошлайди. Хитой эса 21 март куни Тайланд билан куч синашади. Ярим финалда ғолиб чиққан жамоалар 25 март куни финалда ўзаро тўқнаш келишади. Шунингдек, ярим финалда мағлубиятга учраган жамоалар 25 март куни 3-ўрин учун баҳсда майдонга тушишади.
