ТОШКЕНТ, 4 мар – Spunik. Ўзбекистон ҳарбийлари Челябинск вилоятидаги Чебаркуль полигонида Россия танк қўшинларининг ўқув-машғулотларини кузатишди, деб хабар қилмоқда Мудофаа вазирлиги матбуот хизмати.
“Ўқув-машғулотлар давомида шартли душман авиация ҳужуми ва оммавий қирғин қуролларидан фойдаланилганида асосий кучларнинг ҳаракатлари амалда кўрсатилди”, - дейилган хабарда.
Машғулотнинг сўнгги босқичида ҳарбий хизматчилар «Т-72Б» танклари ҳамда «БМП-2» пиёдалар жанговар машиналаридан шартли душманнинг зирҳли ва жонли кучларига қарата ўт очди. Бунда ҳаводан «Ми-24» авиация вертолётлари ёрдам кўрсатиб турди.
Тажриба алмашиш жараёнида ўзбекистонлик ҳарбий хизматчилар россиялик танкчилар бўлинмаларининг жанговар тайёргарлиги жараёнлари, шунингдек, кечаю кундуз учувчисиз учиш қурилмалари ва шартли диверсион-разведка гуруҳларига қарши курашишнинг янгича усуллари билан танишди.
Тактик машғулотларга мингдан ортиқ ҳарбий хизматчи, 200 га яқин ҳарбий техника, хусусан, «Мcта-Б» гаубицаси, «Град» залп ўт очиш реактив тизими ҳамда бешинчи авлод алоқа техникаси жалб этилди.
