ТОШКЕНТ, 22 янв – Sputnik. Россия Таълим ва маданият маркази кўмагида Тошкентда "Ўзббекистонда рус тили - янги уфқлар" танлови ўтказилмоқда. Бу ҳақда "Рус гуманитар миссияси" матбуот-хизмати хабар қилмоқда.
Танлов Россия маданияти, тарихи ва рус тилига жамоатчилик қизиқишини шакллантириш ва Ўзбекистонда рус тили ўқитувчиларининг малакасини оширишга кўмаклашиш мақсадида ўтказилмоқда.
Педагоглар танловнинг бир нечта босқичларидан ўтишлари керак бўлади. Биринчи босқичда ўқитувчилар "Касбим сари йўл" мавзуида эссе ёзишлари керак бўлади. Бу ишлар орасидан ҳайъат аъзолари 30 эссени танлашади ва муаллифлар кейинги турга йўл олади.
Иккинчи турда ўқитувчилар мактаб дарси видеофрагментини тайёрлашади. Ўн нафар ғолиб исмлари 2019 йил 10 июнда "Рус гуманитар миссияси" сайтида эълон қилинади. Айнан мана шу ўн ғолиб 2019 йил ёз фаслида Россияга саёҳатга йўлланмани қўлга киритади.
"Рус гуманитар миссияси" томонидан тақдим этилган статистик маълумотларга кўра, Ўзбекистонда тахминан 10% болалар рус тилига ихтисослашган мактабларда таълим оладилар. Ўзбек тилида таълим бериладиган мактабларда иккинчи синфдан бошлаб "Рус тили" фани киритилган. Шу билан бирга мактабда рус тилини ўрганадиган ўқувчилардан 50%игина бу тилда бемалол гаплаша олади. 1991 йил ҳолатига рус тилида Ўзбекистоннинг 90% аҳолиси бемалол гаплашган бўлса, 2001 йилда бу кўрсаткич 70%ни, 2018 йилга келиб эса — атиги 50%ни ташкил қилган. Бу муаммо рус тилида дарс берувчи ўқитувчиларни қўллаб-қувватлаш дастури мавжуд эмаслиги билан изоҳланади.
