ТОШКЕНТ, 25 ноя – Sputnik. Пекиндан Тошкентга учган самолёт бортида чақалоқ туғилди, деб хабар қилмоқда China-Uzbekistan телегрма канали.
"24 ноябрь куни Пекин-Тошкент йўналишида ҳавога кўтарилган CZ6027 сонли парвозда самолётда чақалоқ дунёга келганлиги сабабли, самолёт Пекин аэропортига қайтиб қўнди. Она ва бола саломатлиги яхши”, - дейилган хабарда.
Чақалоқнинг онаси Наргиза Қосимова исмли ўзбекистонлик аёл. Ушбу фарзанд у кишининг бешинчи фарзанди. Чақалоқ 7 ойлик муддатда дунёга келган. Айни дамда улар Пекиндаги Hemujia шифохонасида.
Дарё.уз сайти хабарига кўра, ушбу самолёт бортида тошкентлик акушер-гинекологлар, тиббиёт фанлари докторлари Гульсара Ешимбетова ва Раҳматилла Ниёзметовлар бўлган ва айнан улар чақалоқни дунёга келтиришда кўмаклашишган.
