ТОШКЕНТ, 14 окт – Sputnik. Шавкат Мирзиёев 13 октябрь куни Ўзбекистонга амалий ташриф билан келган Россия иқтисодий ривожланиш вазири Максим Орешкинни қабул қилди.
Ўзбекистон президенти меҳмонни қутлар экан, Россия ва Ўзбекистон ўртасидаги стратегик шериклик ва иттифоқчилик муносабатлари изчил ривожланиб бораётганини катта мамнуният билан қайд этди.
Хусусан Ўзбекистон ва Россия орасида сўнгги йил давомида 80 дан ортиқ юқори даражали ташрифлар амалга оширилгани, Ўзбекистон ҳудудлари ва Россиянинг 28 субъекти билан шериклик муносабатларини йўлга қўйилгани ҳамда ўзаро товар айирбошлаш ҳажми 20 % дан ошгани қайд этилди.
Учрашувда Россия Федерацияси Президентининг Ўзбекистон Республикасига бўлажак давлат ташрифи кун тартибидаги иқтисодий масалалар юзасидан фикр алмашилди.
Иқтисодий ривожланиш вазири давлатимиз раҳбарига самимий қабул учун миннатдорлик билдириб, Россия Федерацияси Президенти Владимир Путин ҳамда Ҳукумат Раиси Дмитрий Медведевнинг саломи ва энг эзгу тилакларини етказди.
Мамлакатларимиз ўртасидаги кенг кўламли ва ўзаро манфаатли амалий ҳамкорликни ривожлантиришдан икки томон ҳам манфаатдор экани таъкидланди.
