ТОШКЕНТ, 19 сен - Sputnik. Кеча 18 сентябрь куни АҚШнинг халқаро диний эркинлик соҳасидаги махсус топшириқлар бўйича элчиси Самуэл Браунбек бошчилигидаги делегация Диний идорага келди, деб хабар қилмоқда Ўзбекистон Мусулмонлар идораси.
У ерда Самуэл Браунбек Ўзбекистон мусулмонлари идораси раиси, муфтий Усмонхон Алимов ҳазратлари ушбу мартабали меҳмон билан мулоқот ўтказди.
Учрашув аввалида Ўзбекистон муфтийси Республикада диний ибодатларни, маърака маросимларни эмин-эркин ва тинчлик-осойишталикда адо этиб келинаётгани ҳамда юртимиздаги хайрли ислоҳотлар, улкан ижроотлар ва илғор ташаббуслар ҳақида сўзлаб берди.
Элчи Самуэл Браунбек жаноблари ўтган вақт давомида Ўзбекистонда амалга оширилган диний соҳадаги ишларга юқори баҳо берди. Шунингдек, инсон ҳақ-ҳуқуқлари муқаддас экани, айни пайтда бу масала мамлакатлар манфаати учун катта хизмат қилишини алоҳида таъкидлади.
Мартабали меҳмон “Ҳазрати Имом” мажмуасидаги тарихий обидалар, “Ҳазрати Усмон Мусҳафи”ни зиёрат қилди ва “Барақхон” мадрасасидаги ҳунармандчилик ишлари билан танишди. Учрашув дўстона ва самимий руҳда ўтди.
