ТОШКЕНТ, 4 сен – Sputnik. Ўзбек ва инглиз тилларида ахборот берувчи 100 дан ортиқ йўл кўрсатгичлари ўрнатилди, деб хабар қилмоқда УзА.
Тошкент вилоят туризмни ривожлантириш департаментидан маълум қилишича, “Бектемир – Чирчиқ – Ғазалкент – Чорвоқ“, “Бектемир – Юқори Чирчиқ – Ғазалкент – Чорвоқ“, “Чорвоқ“ эркин туристик зонаси ва вилоятнинг туристлар оқими юқори бўлган йўллари бўйлаб ўзбек ва инглиз тилларида ахборот берувчи 100 дан ортиқ йўл кўрсатгичлари ўрнатилган.
Бўстонлиқ туманида 10 йўналиш бўйлаб 62 туристик маскан жойлашган бўлиб, мазкур туристик объектларга олиб борувчи 370 километр масофадаги йўллар бўйлаб ҳам йўл белгиларини ўрнатиш ишлари якунланган.
Тошкент вилоятида туризм инфратузилмасини яхшилаш, хусусан, йўловчи сайёҳларнинг кўзланган манзил бўйлаб тўғри ҳаракатланишини таъминлаш мақсадида йўл кўрсатгичлари ўрнатишга алоҳида эътибор қаратилмоқда.
