ТОШКЕНТ, 29 июн — Sputnik. Президент Шавкат Мирзиёев Олмазор туманида жойлашган Тошкент ўйинчоқлари фабрикасига ташриф буюриб, бажарилган ишларни кўздан кечирди. Бу ҳақда президент матбуот хизмати хабар қилди.
Хабарда айтилишича, "NBU Investment" МЧЖ томонидан ташаббускор-инвесторлар билан биргаликда 5 та лойиҳа амалга оширилмоқда. "Toys City", "O`yinchoqlar Fabrikasi", "Funny Kids World", "National Products" ва "United Nation company" каби мазкур корхоналарда болалар учун кийим-кечаклар, турли буюмлар ва ўйинчоқлар ишлаб чиқарилади. Уларда жами 920 дан ортиқ иш ўрни яратилади.
Бугунги кунда "Toys City" корхонаси ишга туширилган бўлиб, 70 га яқин маҳсулот тайёрлаш йўлга қўйилган.
Шавкат Мирзиёев мазкур корхонада ўйинчоқлар ишлаб чиқариш жараёни билан танишди.
