Андижон, Наманган, Фарғона вилоятлари Шарқий ҳарбий округидаги дала ўқув майдонларининг бирида ўтган амалий машғулотлар жараёни қўшинлар жанговар тайёргарлигининг янгича усул ва услублари асосида ўтказилди, деб хабар қилди Ўзбекистон Мудофаа вазирлиги матбуот-хизмати.
Таъкидланишича, майор Расулхон Ахмедов командирлик қилаётган бўлинма шахсий таркиби билан ўтказилган амалий машқларда нафақат янгича ёндашувларга балки шахсий таркиб орасида ҳамжиҳатликда ҳаракат қилишни, соғлом рақобатбардош муҳитни оширишга ҳам алоҳида эътибор қаратилган.
Эслатиб ўтамиз, Ўзбекистон президенти, мамлакат Қуролли Кучлар Олий Бош Қўмондони Шавкат Мирзиёев Бухоро вилоятидаги Жануби-Ғарбий махсус ҳарбий округга қарашли ҳарбий қисмлардан бирида бўлганида "бугунги таҳликали мураккаб даврда Ватан ҳимоячилари зиммасида осмонимиз мусаффолиги ва халқимиз тинчлигини таъминлашдек ўта масъулиятли вазифа турганини, ҳарбий хизматчилар ҳар қандай таҳдид ва хавф-хатарларга қарши ҳар лаҳзада тайёр туриши лозимлиги"ни қайд этган эди.
