ТОШКЕНТ, 6 мар — Sputnik. Ўзбекистоннинг биринчи президенти Ислом Каримовнинг кенжа қизи Лола Каримова-Тилляева гимнастика федерацияси президенти лавозимини тарк этмоқда.
"Мана 13 йиллик фаолиятимдан сўнг, Ўзбекистон гимнастика федерацияси Президентлиги лавозимини тарк этишга мажбур эканлигимни эълон қилмоқчиман. Мен барча спортчиларимиз, федерациянинг бутун мураббийлар жамоаси ҳамда барча ишчи ходимларига аъло бажарилган фаолиятлари, ушбу спорт турини юқори даражага кўтаришдаги ҳиссалари, унинг ривожланиш йўлида тинимсиз меҳнатлари ҳамда ғайратлари учун чин дилимдан ташаккур билдирмоқчиман", — деган Лола Каримова ўз постида.
Каримованинг сўзларига кўра, у Осиё Гимнастика Иттифоқининг фаҳрий президенти лавозимини сақлаб қолади ва ушбу спорт турининг ашаддий муҳлисларидан бўлиб қолаверади.
Эслатиб ўтамиз, феврал ойи бошида Лола Каримова Ўзбекистоннинг ЮНЕСКОдаги элчиси вазифасини тарк этаётгани ҳақида маълум қилган эди.