Ўзбекистон Республикаси президентининг "Ўзбекистон Республикаси фуқароларининг муддатли ҳарбий хизматга навбатдаги чақируви ҳамда белгиланган хизмат муддатларини ўтаб бўлган ҳарбий хизматчиларни Қуролли Кучлар резервига бўшатиш тўғрисида"ги қарорига мувофиқ шу кунларда йигитлик бурчини шараф билан ўтаган аскарларни уйларига тантанали кузатиш тадбирлари ўтказилмоқда.
Тантанали маросимда Тошкент ҳарбий округи Қўмондони генерал-майор Баҳодир Қурбонов, Чирчиқ шаҳар хокимининг ўринбосари Ж.Маткаримов, Чирчиқ шаҳар Нуроний жамғармаси раиси Ғ.И.Туаев, Чирчиқ шаҳар Ёшлар иттифоқи кенгаши раиси Р.Ж.Сайлиевлар ҳамда кенг жамоатчилик вакиллари ва ҳарбий хизматчилар иштирок этдилар.
"Юртимиз ёшлари учун миллий армиямиз ҳақиқий ҳаёт мактабига айланди. Қуролли Кучларимиз сафида хизмат қилиш ҳар бир ёш ўғлоннинг орзуси, фахр ва шараф ишидир. Чунки миллий армиямиз сафларида хизмат қилиш улар учун улкан имкониятлар эшигини очмоқда", — деди Тадбирни очиб берган генерал-майор Қурбонов.
У аскарларга муддатли ҳарбий хизматни намунали ва муносиб ўтаб, Ватан сарҳадларини ҳимоя қилишга, Ўзбекистон Қуролли Кучлари жанговар қудратини оширишга қўшган ҳиссалари учун миннатдорчилик билдириб, жамиятда ўз ўринларини топишларида муваффақият тилади.
