ТОШКЕНТ, 20 фев — Sputnik. Ўзбекистон Мудофаа вазирлиги тизимидаги бир гуруҳ офицер ва сержантлар Тошкентда Инҳа университетида ахборот-коммуникация технологияларига оид билим ва малакаларини оширмоқда, деб хабар қилмоқда Daryo.uz нашри Ўзбекистон Мудофаа вазирлигига асосан.
“Инҳа университетининг етук мутахассислари томонидан махсус дарслар ўтилмоқда. Ҳар бир машғулотни қунт ва қизиқиш билан ўзлаштирмоқдамиз. Ушбу инновацион билим ва кўникмалар келгусида нафақат ҳарбий хизмат жараёнида балки, ҳаётнинг ҳар бир жабҳасида қўл келиши шак-шубҳасиз”, — дейди капитан Лутфулло Муродов.
Ўқув муддати икки ҳафта бўлган ушбу ўқув курслари Ўзбекистон Республикаси Мудофаа вазирлиги, Ўзбекистон Республикаси Ахборот технологиялари ва коммуникацияларини ривожлантириш вазирлиги ҳамкорлигида икки ҳафталик ўқув курслари ташкил этилди. Ўқув курсини муваффақиятли тугатган ҳарбий хизматчиларга махсус сертификатлар берилиши кўзда тутилган.
Эслатиб ўтамиз, Ўзбекистон Республикаси Президентининг 2017-йил 4 сентябрдаги "Ўзбекистон Республикаси Мудофаа вазирлиги ҳарбий хизматчиларини замонавий ахборот-коммуникация технологиялари соҳасида малакасини ошириш бўйича қўшимча чора-тадбирлар тўғрисида"ги қарорни имзолаган эди.
