Ўзбекистонда фото ва видеосъемкаларни таъқиқловчи янги белги пайдо бўлади

ТОШКЕНТ, 13 фев — Sputnik. Ўзбекистонда яқин ойларда жамоат жойлари, бино ва иншоотларни фото ва видеосъемка қилиш таъқиқланиши ёки мавжуд чекловлар ҳақида маълумот берувчи ягона белги пайдо бўлади, деб хабар берди Sputnik Ўзбекистон мухбири.

Бу Вазирлар маҳкамасининг "Ўзбекистон Республикаси ҳудудида жамоат жойлари, бино ва иншоотларни фото ва видеосъемка қилиш тартиби тўғрисидаги Низомни тасдиқлаш" лойиҳасида кўзда тутилган.

Ҳужжатга мувофиқ, ҳар қандай фуқаролар таъқиқ ёки чеклов белгиси қўйилмаган жамоат жойлари, бино ва иншоотларни фото ва видеосъемка қилиш ҳуқуқига эга.

Шунингдек, улар объект эгаларидан съемка қилиш тартибини аниқлаштирувчи тушунтиришлар ва ҳужжатларни талаб қилиш ҳуқуқига эга.

Ҳужжатда аниқ қайд этилганки, Тошкент, Нукус ва вилоят марказларида жойлашган бино ва иншоотларнинг, агар у таъқиқланган объектлар рўйхатига киритилмаган бўлса, ташқи томонини фото ва видеосъемка қилишга таъқиқ ёки чеклов қўйишга рухсат берилмайди.

Ўз хизмат вазифасини бажараётган ҳарбий хизматчи ёхуд ҳуқуқни муҳофаза қилиш органи ходимларини қурол-аслаҳалар, ҳарбий техника, шунингдек, ИИВ, ФВВ, Мудофаа вазирлиги, МХХ ва Миллий гвардия бўлинмаларининг тезкор ва хизмат-жанговар фаолиятини суратга тушириш таъкиқланади.

Фото ва видеосъемкаларнинг ўзига тўхталадиган бўлсак, у жамоат жойларида тартибни бузмаслиги, бошқа шахсларга ноқулайлик ва хавф туғдирмаслиги, транспорт ҳаракатланишига тўсқинлик қилмаслиги, мансабдор шахсларга ўз вазифасини бажаришига тўсқинлик қилмаслиги, юридик ва жисмоний шахсларнинг қонуний ҳуқуқ ва манфаатларини бузмаслиги керак.

Ўзбекистон Вазирлар маҳкамаси Қорақалпоғистон Вазирлар кенгаши, вилоят ҳокимиятлари ва Тошкент ҳокимлигига фото ва видеосъемкаларни амалга ошириш мумкин бўлмаган жамоат жойлари, бинолар ва иншоотлар рўйхатини шакллантириш топшириғини берган. Бу иш уч ой муддатда амалга оширилиши лозим.