ТОШКЕНТ, 26 янв — Sputnik. Ўзбекистон раҳбари Шавкат Мирзиёев истеъмолчиларга табиий газ етказиб беришда йўқотишларга йўл қўйилаётганини танқид қилди, деб хабар берди президент матбуот-хизмати.
Хорижий компаниялар билан ҳамкорликда юқори ва ўрта босимли газ тақсимот тизимини ривожлантириш, автотранспортларни газга ўтказиш бўйича кўрсатмалар берилди. Шунингдек, истеъмолчиларнинг энергия ресурсларидан самарали фойдаланиш маданиятини ошириш муҳимлиги қайд этилди.
Нефть-газ соҳасини 2030 йилгача ривожлантириш концепциясини ишлаб чиқиш, "Ўзбекнефтгаз" акциядорлик жамиятининг кредит рейтингини аниқлаш ишларини жадаллаштириш бўйича ҳам вазифалар белгиланди.
Муҳокама қилинган масалалар бўйича зарур ҳужжатлар қабул қилиш ва белгиланган чора-тадбирларни ўз вақтида амалга ошириш юзасидан тегишли топшириқлар берилди.
