ТОШКЕНТ, 24 янв — Sputnik. Регистондаги савдо шохобчалари орқали ҳунармандларимиз ўз маҳсулотларини сотиш имконига эга бўлмоқда, фақат бу шохобчаларни тўлиқ ўзимизни миллий услубда ташкиллаштиришимиз керак, деди Спутник мухбирининг тарихий объектларнинг савдо точкаларига айлантирилишига қандай қарайсиз, деган саволига жавобан "Ўзбектуризм" қўмитаси раиси Азиз Абдуҳакимов.
"Қачон ҳунармандчилик ривожланади? Қачонки ҳунармандларимиз шундай жойларда савдо-сотиқ қилса, уларни маҳсулотлари ўша ердан сотилса, бошқа иложи йўқ. Очиғини айтаганда, буям бир аччиқ ҳақиқат, бу шохобчаларда Хитойдан келган товарлар ҳам сотилмоқда. Шунинг учун уларни сал тартибга солиб, ўзимизни миллий анъаналарга хос, милий услубда бўлган сувенир дўконларига айлантиришимиз керак", — деди Абдуҳакимов.
Туризм қўмитаси раиси, шунингдек, ҳунармандлар ўз маҳсулотларини арзон нархларда сотишларига қарши эканлигини айтиб ўтди.
"Ҳамма нарсани ҳам арзонга қилишимиз керак эмас. Ўзимизни имкониятларимизни паст нархларда ўтказамиз. Чет элдагилар ўзларининг ўймакорлик ёки каштачилик маҳсулотларини ҳеч қачон бизни нархда сотмайди", — деди у.
