ТОШКЕНТ, 21 янв — Sputnik. "Орзу ва ҳаёт" Халқаро хайрия жамоат фонди раҳбари Илҳомжон Қосимов Ақтўбе шаҳрида юз берган фожеа — автобус ёниб кетиши оқибатида ҳалок бўлган ўзбекистонликлар оилаларига моддий ёрдам бериш мақсадида хайрия марафонини ўтказмоқда, деб хабар қилди Спутник Ўзбекистон мухбири.
Марафон 2018 йил 18 январ куни юз берган даҳшатли ҳалокат — 52 нафар мигрантнинг автобус ичида ёниб ҳалок бўлганининг 3 кунидан сўнг ўтказилмоқда. Эслатиб ўтамиз, 2018 йил 18 январ куни Қозоғистон Республикаси Ақтўбе вилояти Ирғиз туманида автобуснинг ёниши содир бўлди, ёнғин натижасида 52 нафар Ўзбекистон фуқаролари ҳалок бўлган.
"Тўғри, ҳалок бўлганларнинг оилаларига давлат томонидан моддий ёрдам кўрсатилади, дейилди. Лекин жамоатчилик ёрдамининг ўрни бошқа. Бу билан биз ўзбекистоликлар бир тану-бир жон эканлигини, ўз юртдошининг дарду-қайғусига маҳалла-кўй, умуман халқ беэътибор эмаслигини кўрсатмоқчимиз", — деди Илҳомжон Қосимов."
Маълум қилинишича, нақд пул ҳолатида тушадиган хайр-эҳсонлар махсус қутиларда жамланиб борилади, қолаверса, фуқаролар маблағларни марафонга сафарбар этилган автомобилдаги акция қоғозларида ёзилган ҳисоб-рақамларига ўтказишлари мумкин бўлади.
Таъкидланишича, марафон Тошкентдан бошланади ва Гулистон, Жиззах, Самарқанд, Навоий, Бухоро, Хоразм, Тўрткўлни босиб ўтиб, Бухорога қайтади ва у ердан Қарши, Шаҳрисабз, Олмалиқ билан Фарғона, Андижон ва охири Наманганга келиб, сарҳисоб қилинади.
"Орзу ва ҳаёт" раҳбарининг айтишича, тушадиган маблағлар Ақтўбе қурбонлари оилалари ўртасида тенг тақсимланади.
