ТОШКЕНТ, 9 дек — Sputnik. Грузиянинг собиқ президенти Михаил Саакашвили муддатсиз очлик эълон қилди. Бу ҳақда унинг адвокати Руслан Чернолуцкий маълум қилди, деб хабар бермоқда РИА Новости.
"У муддатсиз очлик эълон қилганини билдирди ҳамда мажбурий овқатлантиришларини ҳам рад этади. Агарда 60 суткага қамоқ жазоси тайинланса, у очликни давом эттиради", — деди Чернолуцкий.
Эслатиб ўтамиз, 9 декабрь куни Украина бош прокурори Юрий Луценко Саакашвили ҳуқуқни муҳофаза қилиш органлари томонидан қўлга олингани ва Украина хавфсизлик хизматининг вақтинчалик сақлаш изоляторига олиб келингани ҳақида маълум қилганди. Тунда изолятор атрофида собиқ губернаторнинг тарафдорлари тўпланишди. Улар УХХ ҳовлисига кириш эшигини тўсиб қўйишди.
Саакашвили "жиноий ташкилот билан ҳамкорлик қилишда" айбланмоқда.
