ТОШКЕНТ, 22 ноя — Sputnik. Ўзбекистон Жанубий Кореяга 2018 йилгача 70 миллион долларлик тўқимачилик маҳсулотларни етказиб беради, деб хабар қилди Sputnik мухбири.
Хабарда айтилишича, "Ўзбекенгилсаноат" делегация вакиллари кореялик йирик савдо компаниялари — Posco Daewoo, Color Paradise, Solsang International Corp, Ratel E&T co, Ltd, Korea Factory, шунингдек Lotte Mart билан ўтказилган музокараларда ушбу келишувларга эришилди.
"Кореялик ишбилармонларга "Узтекс" ва "Озборн текстиль" компанияларининг текстил маҳсулотлари жуда ёқди", — деб изоҳ берилди Жанубий Кореяга Ўзбекистон президенти ташрифини ёритиш матбуот маркази томонидан.
Учрашувда Корея халқаро савдо уюшмаси — KITA раҳбарияти ва миллий электрон савдо майдони KTNET 2017-2018 йилларда Ўзбекистон текстил маҳсулотларини KOREA Trade савдо майдонида сотиш ишларини янада ривожлантиришга келишиб олинди.
Эслатиб ўтамиз, шу йил бошида Ўзбекистон Жанубий Кореяга 23,4 миллион долларлик турли ярим тайёр текстил маҳсулотларни экспорт қилди. Шунингдек, шу йилда Lotte Mart савдо тармоғига тўқимачилик маҳсулотлари самарали етказиб берилди.
