ТОШКЕНТ, 26 окт — Sputnik. Бугун Ўзбекистон Республикасининг Биринчи Президенти Ислом Каримов номидаги илмий-маърифий ёдгорлик мажмуаси сайти ишга тушди.
Биринчи Президент хотирасини, унинг мустақилликни қўлга киритишга, давлатчиликни қуришга қўшган улкан ҳиссасини ва Ислом Каримов шахсининг тарихий ролини абадийлаштириш, шунингдек унинг меросини оммалаштириш ёдгорлик мажмуасининг асосий вазифаларига киради.
Мажмуа таркибига музей, илмий-тадқиқот ва таълим маркази, кутубхона ҳамда конференция зали киради.
Мажмуа ўз фаолиятини Ислом Каримов номидаги Республика хайрия жамоат фонди билан ўзаро ҳамкорликда олиб боради.
Ёдгорлик мажмуаси сайтида Ислом Каримов таржима ҳоли ҳамда унинг қаламига мансуб асарлар, фотогалерея билан танишиш мумкин. Сайтдаги маълумотлар ўзбек, рус ва инглиз тилларида берилган.
