ТОШКЕНТ, 10 сен — Sputnik. Ўзбекистон Президенти Шавкат Мирзиёев Туркия ва Эрон президентлари билан учрашди, деб хабар қилинди Ўзбекистон президенти расмий сайтида.
Музокарада Ўзбекистон ва Туркиянинг савдо-иқтисодиёт, инвестиция, сайёҳлик ва бошқа соҳалардаги алоқаларини кенгайтириш масалалари муҳокама қилинди. Минтақавий ва халқаро масалалар юзасидан фикр алмашилди", — дейилади хабар матнида.
Остона шаҳрида ўтаётган Ислом ҳамкорлик ташкилоти саммити доирасида Ўзбекистон раҳбари шунингдек, Эрон Ислом Республикаси Президенти Ҳасан Руҳоний билан учрашган. Мулоқотда икки давлат ўртасидаги дўстона муносабатларнинг мустаҳкамланиши ўзаро манфаатли ва узоқ муддатли ҳамкорликни янада кенгайтиришга хизмат қилиши таъкидланди.
Эслатиб ўтамиз, бугун Қозоғистоннинг Остона шаҳрида ИҲТ иштирокчи-давлатларининг фан ва технологиялар бўйича саммити бўлиб ўтмоқда. Куни кеча Ўзбекистон раҳбари Қозоғистон президенти таклифига биноан Остонага учиб кетди.
Шавкат Мирзиёев саммит доирасида хорижий делегациялар раҳбарлари билан ҳам икки томонлама учрашув ўтказилиши режалаштирилган.
