ТОШКЕНТ, 6 сен — Sputnik. Тошкентда бўлиб ўтадиган "Asian Fight-2017" турнирида фахрий меҳмон сифатида таклиф этилган Голливуд юлдузи Жан Клод Ван Дамм ўрнига бошқа бир Голливуд юлдузи Стивен Сигал ташриф буюради. Бу ҳақда турнирнинг ОАВ билан ишлаш бўйича менежери Жамшид Хожиакбаров Sputnik мухбири билан суҳбатда маълум қилди.
Хожиакбаровнинг айтишича, Ван Даммнинг Ўзбекистонга келиши учун барча чипта, меҳмонхона харажатлари тўланган, шартнома бўйича сумманинг бир қисми ҳам ўтказиб берилган. Аммо куни кеча Жан Клод Ван Даммнинг оғир бетоб бўлиб қолганлиги ва Ўзбекистонга кела олмаслиги турнир ташкилотчиларига хабар қилинган.
Ташкилотчиларнинг саъй-ҳаракатлари натижасида Ван Даммнинг ўрнига Голливуднинг яна бир юлдузи, жанг санъати устаси Стивен Сигал фахрий меҳмон сифатида ташриф буюради.
Шунингдек, ташриф буюриши эълон қилинган Жефф Монсон ҳам келмайдиган бўлди. У билан келишувни турнир ташкилотчиларининг ўзлари бекор қилишган. Хожиакбаровнинг айтишича, Монсон Ван Дамм билан бирга келиши мўлжалланган, лекин Ван Дамм кела олмаслиги маълум бўлгач, Жефф билан келишув бекор қилинган.
8 сентябр куни Стивен Сигал "Ўзбегим" миллий фестивалида рекорд палови тайёрлаш жараёнида иштирок этиши, спортчилар учун мастер-класслар ўтказиши кўзда тутилган.
Эслатиб ўтамиз, Тошкентдаги "Бунёдкор" стадионида бўлиб ўтадиган Asian Fight-2017 халқаро турнирида ўзбекистонлик 8 нафар спортчи Сингапур, Афғонистон, Россия, Ҳиндистон, Қозоғистон, Қирғизистон, Озарбайжон, Кипр мамлакатларининг жангчилари билан куч синашишади.
