ТОШКЕНТ, 29 авг — Sputnik. Ўзбекистон президенти Шавкат Мирзиёев ва АҚШ президенти Дональд Трамп сентябр ойида ўтказилиши режалаштирилган БМТ Бош Ассамблеясида илк бор умумий сиёсий музокараларда иштирок этадилар. Podrobno.uz хабарига асосан.
19 сентябр куни БМТ бош котиби Антониу Гутерриш ва сессия раиси Мирослав Лайчакнинг чиқишлари орқали музокараларга старт берилади. Тахминларга кўра, музокараларнинг биринчи кунида Ўзбекистон президенти Шавкат Мирзиёев ва АҚШ президенти Дональд Трамп чиқиш қиладилар. Шунингдек, Арманистон, Боливия, Афғонистон, Бразилия, Исроил, Польша, Франция ва бошқа давлат раҳбарлари ҳам нутқ сўзлайдилар.
БМТ Бош Ассамблеяси иши 25 сентябрга қадар давом этади. Форум дастлабки режасига кўра, 21 сентябр куни Россия Ташқи ишлар вазири Сергей Лавров нутқ сўзлайди.
Бош Ассамблеянинг сўнги кунида Шимолий Корея ва Сурия ташқи ишлар вазирлари чиқишлари кутилмоқда.
Эслатиб ўтамиз, БМТ Бош Ассамблеяси — бу умумий сиёсий музокаралар ўтказиладиган халқаро форум ҳисобланади ва Нью-Йоркдаги БМТ бош қароргоҳида ўтказилади. Халқаро сиёсий анжуман давомида БМТга аъзо давлатлар делегация раҳбарлари минбардан дунё ҳамжамияти олдида турган асосий хавф-хатарлар, халқаро ва минтақавий инқирозлар хусусида ўз фикрларини билдирадилар.
