TOШКЕНТ, 9 август — Sputnik. Жанубий Кореянинг Инчеон шаҳридаги Ewha Womans University госпиталининг бир гуруҳ малакали профессор, шифокорлари ва кўнгиллилар делегацияси Фарғона водийси аҳолисини чуқурлаштирилган тиббий кўрикдан ўтказади. Бу ҳақда auz.uz хабар қилмоқда.
Кореялик шифокорлар Андижон вилоят кўп тармоқли тиббиёт марказида тўрт кун мобайнида аҳоли саломатлигини кўрикдан ўтказадилар. Уларга маслаҳатлар берадилар, Кореядан келтирилган дори-дармон ва санитария-гигена воситаларини бепул тарқатадилар.
Ташриф доирасида меҳмонлар Андижон давлат тиббиёт институти фаолияти билан яқиндан танишадилар. Институт талабалари ва магистрлари учун лекциялар ўқийдилар. Бу эса ҳар иккала тиббий муассаса мутахассисларининг тиббий соҳадаги билимларини чуқурлаштириш ва ҳамкорлик ришталарини мустаҳкамлаш имконини беради.
"Sog`lom avlod uchun" халқаро хайрия фондининг соғломлаштириш дастури асосида ташкил этилган ушбу тадбир жисмонан бақувват, руҳан тетик фарзандларни тарбиялаш, оналик ва болаликни муҳофаза қилиш йўлидаги эзгу саъй-ҳаракатларни ўзида мужассам этади.
Нажмиддин Эргашев.
