ТОШКЕНТ, 18 май — Sputnik. МХХ вакилининг Sputnik Ўзбекистон мухбирига айтишича, 65 ёшли Умарқул Қодиров келини Абдуллаеванинг (тергов манфаатлари юзасидан исм-шарифлар ўзгартирилган) ўлими учун 2 минг доллар тўлашини билдириб қотил излаган вақтида ҳуқуқни муҳофаза қилувчи органлар эътиборига тушади.
"У ўғлининг Абдуллаева билан ажрашиш жараёнида келинининг умумий мулкка даъво қилишидан норози бўлган. Махсус операция чоғида Қодиров гўёки келинининг ўлимини тасдиқловчи фотосуратни кўрганидан сўнг 2 минг долларни ёлланма қотил сифатида иш олиб борган оператив ходимга бераётганида қўлга олинди", — деб маълум қилди МХХ ходими.
Ҳозирда Умарқул Қодировга нисбатан Ўзбекистон Республикаси Жиноят кодексининг 25- ("Жиноятга тайёргарлик кўриш ва жиноят содир этишга суиқасд қилиш") ва 97- ("Қасддан одам ўлдириш") моддалари бўйича жиноят иши қўзғатилган. Тергов ҳаракатлари олиб борилмоқда.
Бизнинг Telegramдаги ўзбекча каналимизга обуна бўлинг ва энг янги хабарларни биринчи бўлиб ўқинг.
