Ўзбекистоннинг собиқ Бош прокурори вафот этди

Oбуна бўлиш
Куни кеча Ўзбекистон Республикаси Конституциявий суди раиси ўринбосари Бўритош Мустафоев 68 ёшида оғир хасталикдан вафот этди

ТОШКЕНТ, 13 апр — Sputnik. Куни кеча Ўзбекистон Республикаси Конституциявий суди раиси ўринбосари Бўритош Мустафоев 68 ёшида оғир хасталикдан вафот этди, деб хабар қилди Конституциявий суд матбуот-хизмати.

У 9 апрель куни Тошкент шаҳридаги Юрак хасталиклари клиникасига ётқизилган.

"Бўритош Мустафоев оқил ва олийжаноб, Ватанни самимий севадиган ва халқи учун жонкуяр инсон эди. У мамлакатимизда қонунийлик ва ҳуқуқ-тартиботни таъминлашга, ҳуқуқ тизимининг шаклланиши ва ривожланишига катта ҳисса қўшган", — дейилган Ўзбекистон Республикаси Конституциявий суди хабарида.

Иномжон Усмонхўжаев - Sputnik Ўзбекистон
Ўзбекистоннинг собиқ раҳбари - Усмонхўжаев вафот этди
Бўритош Мустафоев 1949 йилда Навоий вилоятининг Хатирчи туманида туғилган. 1971 йилда Тошкент давлат университетининг юридик факультетини тугатиб, меҳнат фаолиятини Самарқанд вилоят прокуратурасининг бўлим прокурори лавозимидан бошлаган. Кўп йиллар давомида прокуратура органларида масъулиятли лавозимларда ишлаб, 1989 йилда Ўзбекистон Республикаси прокурори, 1993 йилда эса Ўзбекистон Республикасининг Бош прокурори лавозимига тайинланди.

1998 йилдан бошлаб Ўзбекистон Республикаси Президентининг Давлат маслаҳатчиси ўринбосари, Адлия вазирининг ўринбосари, Конституциявий судининг раиси, Марказий сайлов комиссиясининг раиси, Олий судининг раиси лавозимларида ишлади. 2014 йилда Ўзбекистон Республикаси Конституциявий суди раисининг ўринбосари лавозимига сайланиб, умрининг охиригача шу лавозимда меҳнат қилган.

Мустафоев "Ўзбекистон Республикасида хизмат кўрсатган юрист" фахрий унвони, II даражали "Шон-шараф" ва "Меҳнат шуҳрати" орденлари билан тақдирланган. Олий малака даражали судья. I даражали Давлат адлия маслаҳатчиси.

Янгиликлар лентаси
0