Қашқадарёда 12 та сув объектида фавқулодда ҳолатлар рўй бериши хавфи аниқланди

ТОШКЕНТ, 5 апр — Sputnik. Қашқадарё вилоят тошқинга қарши комиссиясида сув тошқинлари, сел келиши хавфи олдини олишга қаратилган ҳайъат йиғилиши бўлиб ўтди, деб хабар берди "Қашқадарё  газетаси".

Таъкидланишича, соҳа ходимлари томонидан тошқин ва сел келиши хавфи мавжуд бўлган ҳудудлар мунтазам равишда ўрганилиб, муҳофаза чоралари кўриб келинмоқда. Хусусан, жорий йилда вилоятдаги 12 та сув объектида фавқулодда ҳолатлар рўй бериши хавфи аниқланиб, уни бартараф этиш мақсадида белгиланган тартибда қурилиш ишлари амалга оширилаётгани айтилган.

Маълумки, тоғли ҳудудлардаги қишлоқларнинг кўпчилиги сув манбаларига яқин, деҳқончилик учун қулай сойликлар ҳудудида жойлашган. Айрим оилалар эса ўзбилармонлик билан сув йўлларига янада яқин ҳудудлардан уй қуриб олишган. Бу ҳолат бутун бир оиланинг ҳаётини хавф остида қолдиради.

Йиғилишда ана шундай ҳудудларни ўрганиб, аҳолини хавфсиз ҳудудларга кўчириш, дарё ва сув омборлари атрофидаги емирилишлар, ер чўкишларини аниқлаб, ўз вақтида муҳофаза чораларини кўриш юзасидан кечиктириб бўлмайдиган вазифалар белгилаб олинди. Бу борада масъул ходимларга тегишли топшириқлар берилди.