ТОШКЕНТ, 20 мар — Sputnik. Ўзбекистон миллий терма жамоаси 23 март куни ЖЧ-2018 турнирига саралаш босқичи "А" гуруҳи 6-турида Сурия термасига қарши баҳс олиб борадиган учрашув стадиони ўзгарди. Бу ҳақда Ўзбекистон футбол федерацияси ахборот хизмати хабар берди.
Бўлажак ўйинда Сурия номинал мезбон бўлгани ҳамда мамлакатда сиёсий беқарорлик ҳукмронлик қилаётгани сабабли ОФК ўйинни нейтрал зона — Малайзияда ўтказилишини таъминлаганди.
Мазкур беллашув Малайзиянинг Серембан шаҳридаги Tuanku Abdul Rahman Stadium стадионида бўлиб ўтиши режалаштирилганди. Бироқ стадион ўйинга тайёр бўлмагани учун Сурия-Ўзбекистон баҳси Малакка шаҳридаги Hang Jebat Stadium майдонида ўтказилади.
Ўйин вақти ўзгаришсиз қолган — учрашув маҳаллий вақт билан 20:00 (Тошкент вақти билан 17:00)да бошланади. Беллашувни бошқариб борадиган ҳакамлар гуруҳи ҳам ўзгармаган.
Эслатиб ўтамиз, Ўзбекистон терма жамоаси ЖЧ-2018 саралаш босқичи "А" гуруҳи 5-туридан кейин 9 очко билан учинчи ўринда бормоқда. Сурия 5 очко тўплаган ҳолда тўртинчи ўринни банд қилиб турибди.
