ТОШКЕНТ, 26 янв — Sputnik. Тадбиркорлик ҳамжамияти истакларидан келиб чиқиб, Ўзбекистон Марказий банки Корпоратив карталар тўғрисидаги янги Низомни қабул қилди ва уни Адлия вазирлигига рўйхатдан ўтказиш учун юборди. Бу ҳақда Марказий банк пул муомаласи департаменти ходими Фахриддин Бобоевга таяниб nuz.uz хабар бермоқда.
Унинг айтишича, корпоратив пластик карталар барча ташкилот ва муассасалар томонидан ҳеч қандай чекловларсиз қабул қилинади. Бобоевнинг қайд этишича, бунда фақат битта чеклов кучда қолади — корпоратив картадан банкоматлар орқали нақд пул олиб бўлмайди.
Ҳозирда амалдаги Низомда баъзи чекловлар мавжуд, яъни якка тадбиркорлар уй-жой коммунал соҳасидаги ташкилотлар ва айрим давлат муассасаларига корпоратив карта орқали тўловларни амалга ошира олмайдилар.
Янги Низом Адлия вазирлигида расман рўйхатдан ўтказилгач, қонуний кучга киради.
