ТОШКЕНТ, 27 дек — Sputnik. Ички ишлар идоралари тизимида байрам кунлари тинчлик ва хавфсизликни таъминлашга қаратилган чора-тадбирлар тасдиқланган режа асосида амалга оширилмоқда, деб хабар қилмоқда Uz24 нашри маҳаллий ОАВларга таянган ҳолда.
Хабарда айтилишича, бунда тегишли ташкилотлар билан ҳамкорликда жамоат тартибини сақлаш, йўл ҳаракати ва ёнғин хавфсизлигини таъминлаш ҳамда фавқулодда вазиятларнинг олдини олишга алоҳида эътибор қаратилмоқда.
Хабарда таъкидланишича, пиротехника воситаларининг ноқонуний айланишига чек қўйиш борасида 37 мингдан ортиқ рейд ўтказилган. Натижада 127 ҳолат аниқланиб, улар юзасидан тўпланган ҳужжатлар қонуний чора кўриш учун тегишли идораларга юборилган. 150 мингга яқин пиротехника воситалари мусодара қилинган.
Байрам арафасида ёнғин хавфсизлиги тадбирлари янада кучайтирилган. Соҳа ходимлари аҳоли ўртасида ёнғин хавфсизлиги қоидаларига риоя этиш юзасидан тушунтириш ишларини давом эттирмоқда.
Байрам кунлари йўл ҳаракати хавфсизлигини таъминлаш бўйича ҳам тизимли ишлар олиб борилмоқда. Йўл-патруль хизмати масканларида автотранспорт воситалари қатъий текширувдан ўтказилмоқда. Аҳоли хавфсизлигини таъминлаш учун барча жамоат транспортлари техник кўрикдан ўтказилди. Байрам тадбирлари ўтказиладиган майдонлар атрофидаги йўллар ва йўл белгилари кўздан кечирилиб, камчиликлар бартараф этилган.
