ТОШКЕНТ, 27 дек — Sputnik. Ўзбекистонда бугундан бошлаб транспорт воситаларини олиб қочганлик учун жавобгарлик кучайтирилди. Президент Шавкат Мирзиёев Жиноят кодексига тегишли тузатишлар киритиш тўғрисидаги қонунни имзолади, деб хабар бермоқда РИА Новости маҳаллий матбуотга асосланиб.
Тузатишлар қонун оммавий ахборот воситаларида эълон қилинган кундан бошлаб кучга кирди. Илгарироқ тузатишлар киритиш тўғрисидаги қонун Олий Мажлис Қонунчилик палатаси томонидан қабул қилинган ва Сенат томонидан тасдиқланган эди.
Жиноят кодексининг янгиланган 267-моддасига кўра, транспорт воситасини ўғирлаган шахс 5 йилдан 10 йилгача озодликдан маҳрум этилиши мумкин (илгари 3 йилдан 5 йилгача эди).
Бир гуруҳ шахслар томонидан аввалдан тил бириктирган ҳолда транспорт воситасини ўғирлаганлик учун 10 йилдан 15 йилгача озодликдан маҳрум этиш жазоси қўлланилади (илгари беш йилдан ўн йилгача).
Транспорт воситасини бир гуруҳ шахслар томонидан босқинчилик йўли билан эгаллаб олиш 15 йилдан 20 йилгача озодликдан маҳрум этишга асос бўлади.
Республика Бош прокуратурасининг маълумотларига кўра, кейинги уч йилда Ўзбекистонда транспорт воситасини олиб қочиш ҳолатлари 65%га ошган.
