ТОШКЕНТ, 28 ноя — Sputnik. Президент сайлови арафасида ташкил қилинаётган пресс-клуб аҳолини тезкор ва холис ахборот билан таъминлайди, дейилган Ўзбекистон электрон оммавий ахборот воситалари миллий ассоциацияси томонидан юборилган хатда.
"Mening yurtim", "Sevimli-tv.uz", "Uzreport TV", "Zo'r TV", "Самарқанд-СТВ" нодавлат телеканаллари, "Uzbekistan Today" ахборот агентлиги, "Darakchi inform service" МЧЖ иштирокида жорий йилнинг 4 декабрь куни бўлиб ўтадиган Ўзбекистон Республикаси Президенти сайловини ёритиш бўйича "Press klub: Saylov.uz-2016" Пресс-клуби ташкил этилди — дейилган Ўзбекистон ЭОАВМА хатида.
Миллий ва хорижий ОАВ журналистларини ўз атрофига бирлаштирган пресс-клубнинг асосий мақсади аҳолининг сайлов жараёнига оид тезкор ва холис ахборотлар билан таъминлашдир. Мазкур пресс-клуб 30 ноябрдан 6 декабрда фаолият олиб боради.
Пресс-клуб ушбу муҳим сиёсий жараёндаги барча баҳс-мунозара, мулоқот ва ахборотлар билан бир қаторда сайлов куни натижаларини ҳам тезкорлик билан аҳолига етказишга хизмат қилади.
Пресс клубнинг очилиши мажлиси 30 ноябр куни Тошкентдаги "Интерконтиненталь" меҳмонхонасида бўлиб ўтади.
