ТОШКЕНТ, 9 ноя — Sputnik. Американинг энг "муҳим" штатлардидаги сайловчилар Трамп учун овоз беришди, деб хабар қилмоқда РИА Новости. Ҳатто, демократлар партиясидан АҚШ президентлигига номзод Хиллари Клинтон Трампга қўнғироқ қилиб, ўз мағлубиятини тан олган ҳолда, рақибини ғалаба билан табриклаган.
Интернет оламида сўнгги дақиқаларда омма эътиборига ҳавола қилинаётган шингил янгиликларни ва машҳурлар табрикларини келтириб ўтамиз.
Хилларининг тарафдорлари юм-юм йиғлашмоқда
Демак, айни вақтда Хиллари Клинтоннинг тарафдорлари унинг Нью-Йоркдаги штаб-квартирасини кўзда ёш билан тарк этишмоқда. "Улар тунд кайфиятда, кўзларида эса ёш қалқмоқда. Клинтоннинг ўзи эса бугун сайловчилар олдида чиқиш қилмаслигини маълум қилди. Ҳозиргача олинган маълумотларга кўра, сайловларда республикачи Дональд Трамп ғолиб чиқиши эҳтимоли анча юқори".
"Кампир Хиллари дам олсин"
Россиянинг ЛДПР партияси етакчиси Владимир Жириновский эса "Кампир Хиллари энди дам олсин", — дея таъкидламоқда.
"АҚШ президентлик сайловларида энг яхши номзод ғолиб чиқмоқда: у Россияни уруш очиш билан қўрқитгани йўқ, ахир америкаликлар ҳам тинч-осуда ҳаётни хоҳлайди", — дея таъкидлаган Жириновский.
Трамп — сенсация-одам
Хўш, миллиардернинг ўзи ўз ғалабаси ҳақида нима дейди?
"Эҳтимол, кейинчалик одамлар буларнинг барчаси бекорга бўлмаганини тушуниб етар. Эҳтимол, тўрт ёинки саккиз йилдан кейин "Ҳа, ўшанда тўғри қарор қабул қилинган экан", дерсиз"…
Рига эса ШОКда!
Латвия ТИВ собиқ раҳбари Трампнинг АҚШ президентлигига сайловларда ғалаба қозонганидан ҳамон ҳайратдалигини яширмади.
"Оламшумул хабар. Лекин тан олишдан ўзга чорамиз йўқ. Бу кўплаб молиявий секторлар, аксарият давлатлар, шу жумладан Латвия учун ҳам кутилмаган, ҳайратомуз хабар бўлди. Бир неча ой ичида Трампнинг раҳбарлик услубини тушуниб етишимиз керак бўлади. Ҳозирча бу саволимизга аниқ жавоб йўқ, воқеа қандай ривож топишини кутамиз", — деб айтмоқда Латвия ТИВ собиқ раҳбари Артис Пабрикс.
Нима учун Трамп?
ТОВВ (Анқара) университети ректори Тогрул Исмоил нима учун Хиллари Клинтон эмас, балки Дональд Трамп ғалаба қозонганига изоҳ берди.
"ОбамаАҚШ ички ва ташқи сиёсатида бир қатор муаммоларни юзага келтирди ва уларга ечим топа олмади. Хиллари Клинтон эса бирорта янги нарса таклиф этмади. Шу боис ҳам, ўзгаришларни қумсаб қолган Америка халқи Трампни сайлади", — деди у.
