ТОШКЕНТ, 1 окт — Sputnik. Ўзбекистон парламенти мамлакатда янги иш ўринларини ташкил этиш соҳасида ишлар қандай амалга оширилаётганини ўрганишга бағишланган йиғилиш ўтказди. Бу борада депутатлар олдида Ўзбекистон Меҳнат вазири Азиз Абдуҳакимов ҳисобот қилди.
Вазир ватанга қайтаётган меҳнат муҳожирлари учун иш ўринлари яратилишига алоҳида эътибор билан қаралаётгани ҳақида айтган. Унга кўра, 2016 йилнинг биринчи олти ойи давомида ватанга қайтган меҳнат мигрантлари учун 155,5 минг иш ўринлари яратилган. Шунингдек, органлар томонидан 124,6 минг иш излаётган ишсизлар иш билан таъминланган, 3,5 минг киши касбий маҳоратини оширишга юборилган, 4,9 минг киши эса ҳақ тўланадиган жамоат ишларига йўналтирилган.
Яратилган иш ўринларининг 60%дан кўпроғи қишлоқ хўжалиги соҳасига тўғри келгани, айниқса, эътиборга моликдир.
Бундан ташқари, кейинчалик иш билан таъминлаш учун касб-ҳунар коллежлари битирувчиларини турли корхоналарга амалий машғулотларга юбориш практикаси ҳам ўзини оқлагани айтиб ўтилди. Йил бошидан шу тариқа 466,4 нафар битирувчи иш билан таъминлангани қўшимча қилинди.
Йиғилишда муаммоли масалалар ҳам тилга олинди. Хусусан, Қорақалпоғистон Республикаси ва Сурхондарё вилоятидаги бир қатор туманлар ҳокимиятлари қошида иш ўринларини ташкил этиш учун масъул махсус комиссиялар мавжуд муаммолар ечимига бармоқ ортидан қарагани, ўз ишларига масъулиятсизлик билан ёндашганлиги учун қаттиқ танқид остига олинди.
