ТОШКЕНТ, 16 сен — Sputnik. Ўзбекистон Президенти вазифасини бажарувчи Шавкат Мирзиёевнинг номзоди мамлакат президентлигига илгари сурилди, деб хабар беради РИА Новости Республика Марказий сайлов комиссиясининг Facebookдаги саҳифасига асосланиб.
"Ўзбекистон Либерал-демократик партияси сиёсий кенгаши мажлисида президентликка Ш.М.Мирзиёев номзоди илгари сурилаяпти", — дейилади хабарда.
Миллий тикланиш партияси сиёсий кенгаши 7-Пленумида эса Республика Президенти номзодига Сарвар Отамуратов номзоди таклиф этилди. Бу ҳақда Марказий сайлов комиссиясининг Facebookдаги саҳифасида маълум қилинди.
“Миллий тикланиш партиясидан Ўзбекистон Республикаси Президенти номзодига Отамуратов Сарвар Садуллаевич номзоди таклиф этиляпти”, — дейилади хабарда.
Сарвар Отамуратов 1973 йилда Тошкент шаҳрида туғилган. Миллати ўзбек. 1995 йилда Тошкент давлат университетини (ҳозирги Ўзбекистон Миллий университети) имтиёзли диплом билан тамомлаган. 1998 йилда Ўзбекистон Республикаси Банк-молия академиясини, 2003 йилда Ўзбекистон Президенти ҳузуридаги Давлат бошқаруви академиясини битирган. Социология фанлари номзоди. “Миллий тикланиш” демократик партияси Марказий Кенгашининг раиси.
2015 йилдан буён Олий Мажлис Қонунчилик палатаси Спикери ўринбосари, ахборот ва коммуникация технологиялари масалалари бўйича Қўмита аъзоси.
Ўзбекистоннинг биринчи Президенти Ислом Каримов 2 сентябрь куни 78 ёшида вафот этди. Бош вазир Шавкат Мирзиёев Президент вазифасини вақтинча бажарувчи этиб тайинланди.
Марказий сайлов комиссияси раиси Мирзо-Улуғбек Абдусаломов президент сайловлари 4 декабрь куни бўлиб ўтишини маълум қилди.
