ТОШКЕНТ, 8 сен — Sputnik. 2016-йил 7-сентябр куни Ўзбекистон Республикаси Олий Мажлиси Сенати Раисининг таклифига кўра, Ўзбекистон Республикаси Олий Мажлиси Қонунчилик палатаси ва Сенати Кенгашларининг қўшма йиғилиши бўлиб ўтди, дея хабар қилади "Жаҳон" АА.
Ўзбекистон Республикаси Олий Мажлиси Қонунчилик палатаси Кенгаши ва Сенати Кенгаши Ўзбекистон Республикаси Олий Мажлиси Қонунчилик палатаси ва Сенатининг қўшма мажлисини 2016-йил 8-сентябр куни Тошкент шаҳрида чақириш тўғрисида қўшма қарор қабул қилди.
Ўзбекистон Республикаси Олий Мажлиси Қонунчилик палатаси ва Сенати қўшма мажлиси кун тартибига "Ўзбекистон Республикаси Президентининг вазифа ва ваколатларини бажаришни вақтинча юклаш тўғрисида"ги масала киритилди.
Ўзбекистон Конституциясининг 96-моддасига мувофиқ, Ўзбекистон республикасининг амалдаги президенти ўз вазифаларини бажара олмайдиган ҳолатларда унинг вазифа ва ваколатлари вақтинча Ўзбекистон республикаси Олий Мажлиси Сенати раиси зиммасига юклатилади.
Бунда 3 ой муддат ичида, "Ўзбекистон Республикаси Президенти сайлови тўғрисида"ги Қонунга тўлиқ мувофиқ ҳолда мамлакат президенти сайлови ўтказилади.
Шунга кўра, Ўзбекистон республикаси Олий Мажлиси юқори палатаси – Сенат раиси Ниғматилла Тўлқинович Йўлдошев Ўзбекистон Республикаси президенти вазифасини вақтинча бажаради.