ТОШКЕНТ, 14 июл — Sputnik. Пайшанбага ўтар кечаси рўй берган момақалдироқ ва кучли довул туфайли нафақат Москваликлар жабр кўрган кўринади: Тошкентда рўй берган кучли шамол бир нечта дарахтларни томири билан суғуриб ташлади, парковка ёнида жойлашган дарахтлар қулаши натижасида бир нечта автомобилларга жиддий шикаст етди, деб хабар қилишмоқда ижтимоий тармоқ фойдаланувчилари.
Мисол учун Фейсбук ижтимоий тармоғининг “Водители Ташкента” гуруҳида Тошкент мавзеларидан бирида турган “Жигули” русумли автомобилнинг устига улкан дарахт йиқилгани акс этган фотосуратлар жойлаштирилди.
Фойдаланувчилар, аввало, воқеа оқибатида ҳеч ким жабрланмаганлигидан хурсанд эканликларини айтишган бўлса, бошқалар пойтахтдаги эски дарахтларни кесиш зарурлиги, бўлмаса эски дарахтларнинг ўзи йиқилиб, мана шундай бахтсиз ҳодисаларни келтириб чиқаришлари мумкинлигини ёзиб қолдиришган.
"Дарахтларни таг-томири билан кесиш учун яхшигина сабаб туғилди. Соғ дарахтларни кесишга аллақачон киришишган, чириган дарахтлар эса ўзлари қулаяпти", — дея изоҳ қолдирган интернет фойдаланувчилардан бири.
