Ўтган ҳафтада Тошкентда “Дунё халқлари қўғирчоқлари” лойиҳаси доирасида “Ўзбек қўғирчоқлари” кўргазмаси ташкил этилди. Қўғирчоқлар либоси, орнаменти ва безаклари устида нафақат либослар дизайнери, балки тарихчилар, кулоллар ва заргарлар иш олиб боришган.
Ҳунармандлар миллий қўғирчоқлар ёрдамида ўзбек миллий либослари хилма-хиллигини, рассомчилик санъатини, матолар фактураси ҳамда заргарлар маҳоратини кўрсатиб беришмоқда.
Сўнгги йилларда интерьер безагида ғарбдан кириб келган эргономик ва хай-тек усулларидан фойдаланишдан бироз зериккан дизайнерлар миллий эстетика, шарқ символикасига мурожаат қила бошладилар. Бугунги кунда уй ва офисларга безак беришда – миллий қўғирчоқлардан фойдаланиш урф бўлмоқда.
Чет элликлар, қолаверса, ўзбекистонликлар ҳам ушбу, қўл меҳнати билан яратилган мўжаз қўғирчоқларни бажонидил харид қилишмоқда. Айтганча, интерьер безаги учун яратилган миллий қўғирчоқлар 30 доллардан 2000 долларгача баҳоланади.
Ўзбекистоннинг ҳар бир региони ўз қўғирчоғига эга. Улар аксарият ҳолларда ўз либослари билан фарқланадилар, холос.
Санъатшуносларнинг таъкидига кўра, ҳозирда миллий либослар урф бўлгани, қолаверса, интерьерда ҳам миллий мотивларга кўпроқ урғу берилаётгани боис, миллий стилистика асосида яратилган қўғирчоқлар кўпаймоқда.
Қўғирчоқларни ясаш учун — тош, сопол, шиша, ярим қимматбаҳо тошлар ва ёғочдан фойдаланилмоқда.
Қизиқарли фактлардан бири — ҳар бир қўғирчоқ бошқа ҳеч қаерда такрорланмайдиган оригинал юз тузилишига эга.
