ТОШКЕНТ, 21 янв — Sputnik. Американинг U.S. News and World Report нашри томонидан тузилган “Ҳарбий тайёргарлик жиҳатдан энг кучли давлатлар рейтинги”да биринчиликни АҚШ эгаллаган. Иккинчи ўрин – Россияга, учинчи ўрин эса – Хитойга берилган.
Вашингтоннинг ҳарбий ҳаражатлари мамлакат ялпи ички маҳсулот(ЯИМ)нинг 3,5% ни ташкил қилган бир пайтда, Россия Федерацияси ўз ҳарбий эҳтиёжлари учун ЯИМнинг 4,5%ни сарфлайди. Етакчилар учлигини Хитой якунлаб берган бўлса, тўртинчи ва бешинчи ўринларни Германия ҳамда Буюк Британия эгаллаган.
Рейтингдан дунёнинг 60та мамлакати ўрин олди. Гарчи, Ўзбекистон ушбу рўйҳатга киритилмаган бўлса-да, аммо, Global Firepower тузган дунё рейтингида 54-ўринни эгаллаган ўзбек армияси Марказий Осиёда энг кучли, деб топилганини эътироф этиш мумкин.
Рейтинг BAV Consulting компанияси ҳамда Пенсильвания университети билан ҳамкорликда тузилган. Маълумотлар 36 мамлакатда ўтказилган сўровнома хулосаларига асосланган.
