ТОШКЕНТ, 21 июл – Sputnik. Қирғизистон Евроосий иқтисодий иттифоқининг (ЕОИИ) тўлақонли аъзоси сифатида Мўғулистонга иттифоқ билан интеграцияда ёрдам беришга тайёр. Бу ҳақда Қирғизистон президенти Садир Жапаров Бишкекда мўғулистонлик ҳамкасби Ухнаагийн Хурэлсух билан музокаралар чоғида маълум қилди.
“Қирғизистон Евроосий иқтисодий иттифоқининг тўлақонли аъзоси сифатида Мўғулистон ва ЕОИИ интеграциясини қўллаб-қувватлашга тайёр”, - деди Жапаров.
Қирғизистон етакчисининг сўзларига кўра, мамлакат ЕОИИ ва Мўғулистон ўртасидаги битимни савдо-иқтисодий муносбатларни ривожлантириш учун муҳим восита сифатида кўради.
ЕОИИ мамлакатлари ва Мўғулистон ўртасида вақтинчалик савдо битими 2025 йил 27 июнь куни имзоланди. Ҳозир унинг кучга киришини таъминлаш юзасидан ишлар олиб борилмоқда.