ТОШКЕНТ, 21 июл – Sputnik. Навоий вилоятида атмосфера ҳавоси ифлосланганлиги билан боғлиқ ҳолат ўрганилди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати хабар қилди.
Таъкидланишича, ўрганиш давомида 19 июль куни эрталаб тонги вақти 7:00 дан 9:00 га қадар Навоий вилояти Экология бошқармасининг таҳлилий лабораторияси ҳамда "Навоийазот" АЖга қарашли Санитар лабораторияси билан корхона атрофида таҳлил ишлари олиб борилди. Атмосфера ҳавоси таркиби "EKOLAB" (Газоанализатор) аппарати ёрдамида текширилди.
Қайд этилишича, "Навоийазот" АЖ ва БХО атрофидан таҳлил ишлари олиб борилганда атмосфера таркибида аммиак 1,4 баравар ҳамда водород сулфиди 16,8 баравар меъёрдан юқорилиги аниқланди.
Бундан ташқари, Навоий вилояти Гидрометеорология бошқармаси лабораторияси томонидан олинган таҳлиллар натижасига кўра, 1-кузатув пости (Зулфия кўчаси)да углерод икки оксиди 1,04, аммиак 1,1 баравар, 2-кузатув пости (Меъморлар кўчаси)да эса аммиак 1,2 баравар юқорилиги маълум бўлди.
Ҳозир "Навоийазот" корхонаси ҳудудида текширув ўтказиш ва йўл қўйилаётган камчиликларга аниқлик киритиш чораси кўрилмоқда.