TOШКЕНТ, 14 июл — Sputnik. Россия ҳарбийлари "Ҳамкорлик-2025" қўшма тактик ўқув машғулотларида иштирок этиш учун Ўзбекистонга етиб келди, дея хабар берди Россия мудофаа вазирлиги.
"Марказий ҳарбий округнинг 201-ҳарбий базаси ҳарбий хизматчилари Россия Федерацияси ва Ўзбекистон Республикаси Қуролли Кучларининг "Ҳамкорлик-2025" қўшма тактик ўқув машғулотларида иштирок этиш учун Ўзбекистон Республикасига етиб келди", — дейилади хабарда.
Аниқлик киритилишича, бўлинмалар ҳарбий ва махсус техникалар колонналари таркибида Тожикистон ва Ўзбекистон тоғлари бўйлаб 300 километрдан ортиқ масофани босиб ўтиб, Ўзбекистоннинг "Термиз" полигонига етиб келган.
"Шахсий таркиб БТР-82А бронетехникаларда, Урал машиналарида ва КАМАЗ автомобили базасидаги махсус техникада баланд тоғ йўлларидан кўтарилиш ва тушиш жойларини, шунингдек, тоғ серпантининг тор қисмларини босиб ўтди”, — дея қайд этилган хабарда.
"Ҳамкорлик-2025" Россия-Ўзбекистон қўшма тактик ўқув машғулотлари 2025 йил 15-21 июль кунлари "Термиз" полигонида бўлиб ўтади.