TOШКЕНТ, 8 июл — Sputnik. Россия дўст мамлакатлардаги ҳамкорлар билан биргаликда ишлашга тайёр, юқори технологияли соҳаларга ўзаро сармоя киритишни қўллаб-қувватлайди. Бу ҳақда Россия бош вазири Михаил Мишустин "Иннопром-2025" стратегик сессиясининг ялпи мажлисида маълум қилди.
Екатеринбург шаҳрида 7-10 июль кунлари "Иннопром" халқаро саноат кўргазмаси бўлиб ўтмоқда. Россия бош вазири Михаил Мишустин "Иннопром-2025" стратегик сессиясида "Технологик етакчилик: саноат ютуғи" мавзусида нутқ сўзлади.
"Бугун бу ерда 17 давлат, жумладан, Беларусь, Қозоғистон, Ўзбекистон, Хитой, БАА расмий делегациялари иштирок этмоқда. Шунингдек, Эрон, Қатар, Туркия ва яна бир неча ўнлаб мамлакатлардан келган бизнес вакиллари. Биз конструктив мулоқот ва ўзаро манфаатли ҳамкорликка интилаётган барчани кўришдан мамнунмиз", — деди Мишустин.
Унинг сўзларига кўра, Россия дўстона мамлакатлардаги ҳамкорлар билан биргаликда ишлашга тайёр. Россия бу ерда ўзаро сармояларни, биринчи навбатда, юқори технологияли соҳаларга инвестицияларни олқишлайди.
Унинг қайд этишича, Россия иқтисодиёти янада технологик бўлиши учун илмий ва бизнес ҳамжамиятлари, ҳокимият, экспертлар ва иқтисодиётнинг турли тармоқлари саъй-ҳаракатларини бирлаштириш зарур.
"Президент Владимир Владимирович Путин Петербург халқаро иқтисодий форумида Россия иқтисодиёти янада технологик бўлиши кераклигини таъкидлади. Бу жиддий чақириқ бўлиб, уни ҳал қилиш учун таълим ва илмий муассасалар, саноат ва бошқа соҳалар, экспертлар ҳамжамияти ва инвесторлар... корпорациялар ва ривожланиш институтлари, вазирликлар ва идоралар, минтақавий ҳокимиятларнинг саъй-ҳаракатларини бирлаштириш керак бўлади”, — деди Россия бош вазири.
Россияда қайта ишлаш соҳасининг ўсиши Россияга қарши санкцияларнинг барча ташаббускорларига энг яхши жавобдир, деди Михаил Мишустин.
"Аввалги уч йил якунларига кўра, қайта ишлаш соҳасида ишлаб чиқариш ҳажми ошди, эслатиб ўтаман, 18 фоизга, жумладан, ўтган йили 8,5 фоизга яқин ўсди. Бу рақамлар ташаббускор бўлган ва Россияга қарши тақиқ ва чекловлар киритган барчага энг яхши жавобдир. Аксинча, бу мамлакатларда саноат ишлаб чиқаришининг сезиларли даражада қисқариши кузатилмоқда”, — деди Мишустин "Иннопром"нинг бош стратегик сессиясида.
Россия бизнеси қаттиқ пул-кредит сиёсати фонида ҳам капитал қўйилмаларни кўпайтирмоқда, деди бош вазир.
"Аммо шу билан бирга, бизнес қаттиқ пул-кредит сиёсати ва корхоналар учун кредит ресурсларининг юқори нархи фонида ҳам капитал қўйилмаларни кўпайтирмоқда. Биринчи чоракда асосий капиталга инвестициялар қарийб бир ярим триллион рублга етди, бу ўтган йилнинг шу даврига нисбатан 40 фоиздан кўпроқ”, — деди Мишустин "Иннопром-2025" бош стратегик сессиясида.
Унинг айтишича, авиасозликда тўлиқ суверенитетга эришиш сўзсиз устувор вазифа бўлиб, Россия бу мақсад сари режали равишда ҳаракат қилмоқда.
"Авиасозликда биз учун тўлиқ суверенитетга эришиш сўзсиз устувор вазифадир. Биз бу мақсад сари режали равишда ҳаракат қилмоқдамиз", — деди Мишустин.
Шунингдек, Россия Федерациясида учувчисиз авиация тизимларини ишлаб чиқариш аллақачон режалаштирилган ҳажмдан уч баравар ошди. Қайд этилишича, бунга ҳозирда янги моделларни, жумладан фуқаролик моделларини яратишни ўзлаштираётган корхоналарга давлат томонидан кўрсатилган ёрдам ҳам сабаб бўлган.