TOШКЕНТ, 8 июл — Sputnik. Тошкентда бўлиб ўтган “Иннопром” халқаро кўргазмаси якунлари бўйича 4,7 миллиард долларлик шартномалар имзоланди ва тузилди. Бу ҳақда Екатеринбургдаги "Иннопром" кўргазмаси доирасида ўтаётган сессияда Ўзбекистон бош вазирининг ўринбосари Жамшид Хўжаев маълум қилди.
“Тошкентдаги Иннопромга 35 мамлакатдан 500 дан ортиқ компания ташриф буюрди. Кўргазма якунлари бўйича 4,7 миллиард долларлик шартномалар имзоланди ва тузилди. Ўзбекистон учун Иннопром.Марказий Осиё кўргазмаси минтақамизда янги лойиҳалар, ташаббуслар ва ғояларни яратиш учун анъанавий майдонга айланди. Биз хурсандмиз, чунки ишончли ҳамкорлар, янги дўстлар тўпланмоқда”, — деди Жамшид Хўжаев.
Унинг сўзларига кўра, бугун Ўзбекистон тараққиётнинг янги босқичига қадам қўйди. Ўзбекистон минтақавий ва жаҳон миқёсида ўз ўрнини эгаллашга интилаётган йўналишларни белгилаб олди.
“Тўқимачилик саноати. Агар 6-7 йил олдин Ўзбекистон Республикаси пахта хомашёсини экспорт қилиш бўйича етакчилардан бири бўлган бўлса, бугунги кунда бизда хомашё ишлаб чиқариш ҳажми камайгани йўқ, лекин биз аллақачон хомашёни импорт қилишни бошладик. Ишлаб чиқариш ҳажми 9,7 миллиард долларни ташкил этади. Юқори қўшилган қийматли маҳсулотлар 60 фоизга етказилди. Жорий йилда 4 млрд долларлик маҳсулот экспорт қилишни режалаштирганмиз. Биз фақат хом ашёни экспорт қилганимизда, тахминан 600-700 миллион доллар экспорт қилганмиз”, — дея аниқлик киритди у.
Шунингдек, кон-металлургия тармоғи. Ўзбекистоннинг мақсади хомашё моделидан воз кечиш ва тўлақонли қўшилган қиймат занжирини яратиш: қазиб олишдан тайёр компонентларгача.
“Бу йўналишда Россиянинг металлургия ва машинасозлик корхоналари билан кооперация муҳим аҳамиятга эга. Бизнинг портфелимизда ҳам ушбу йўналишда салмоқли лойиҳалар тўплами мавжуд”, — деди у.
Жамшид Хўжаев қуйидагиларни маълум қилди:
Электротехника саноати. Ўзбекистонда ўтган йили 2,4 миллиард долларлик электротехника маҳсулотлари ишлаб чиқарилди.
Агрокомплекс ва озиқ-овқат саноати. 2024 йил якунларига кўра, 10 миллиард доллардан ортиқ маҳсулот ишлаб чиқарилди.
Автомобиль саноати. Ўтган йили қарийб 400 мингта енгил автомобиль ишлаб чиқарилган бўлиб, саноат маҳсулотларининг умумий ҳажми қарийб 8 миллиард долларга тенг.
Россия Федерацияси билан саноат кооперацияси доирасида ҳар йили қўшма кооперация маҳсулотлари улушини оширишга интиламиз. Россиялик ҳамкасбларимиз билан бу йўналишда ҳам учинчи давлатлардан импорт ўрнини босишга, ҳам учинчи давлатларга экспорт қилишга ҳаракат қиляпмиз.
“Биз Ўзбекистонда нафақат янги саноат тармоқларини барпо этмоқдамиз, балки ҳамкорларимиз билан биргаликда мамлакатимизда янги саноат архитектурасини шакллантиришда шерик бўлишни таклиф этамиз. Ишонч, амалий шериклик ва тенг ҳуқуқли мулоқот орқалигина ҳудудларда саноатнинг барқарор ўсиши ва ривожланишини таъминлаш мумкинлигига ишонамиз”, — дея қайд этди Хўжаев.
Унинг қўшимча қилишича, Ўзбекистон очиқ, ишончли ва қўшма бизнесга тайёр.