TOШКЕНТ, 26 июн — Sputnik. НАТОнинг Гаагадаги саммитида Украина муҳокама учун муҳим мавзу бўлмаган, эътибор альянснинг мудофаа қобилиятини мустаҳкамлашга қаратилган. Бу ҳақда Венгрия бош вазири Виктор Орбан Х ижтимоий тармоғдаги саҳифасида маълум қилди.
"Саммит, ниҳоят, Украинадаги сароблар ортидан қувиш эмас, балки иттифоқимиз ва аъзоларимизни мустаҳкамлаш ҳақида эди. Барқарорлик ва хавфсизлик томон аниқ силжиш - ғалаба қозонилган жанг!", — деб ёзди сиёсатчи.
Зеленский НАТО саммитининг биринчи кунидан кейин Европа Иттифоқини Киев билан интеграциялашув музокараларини имкон қадар тезроқ бошлашга чақирди.
Орбан Владимир Зеленскийга Европа Иттифоқи тинчлик ҳамжамияти сифатида яратилганини, шунинг учун можаро ҳолатида бўлган Украинани қабул қилишни аъзо давлатлардан талаб қилиш уларга нисбатан адолатдан эмаслигини эслатди.
“Европа Иттифоқи аъзо мамлакатларга тинчлик ва фаровонлик олиб келиш учун ташкил этилган. Россия билан уруш ҳолатида бўлган мамлакатни қабул қилиш Европа Иттифоқини дарҳол тўғридан-тўғри можарога тортади. Бирор аъзо давлатнинг бундай таваккалчиликка боришини кутиш адолатдан эмас”, — деб ёзади Орбан.
НАТО саммитининг якуний ҳужжатида Украинани қўллаб-қувватлаш иттифоқнинг мажбурияти эмас, балки ҳар бир мамлакатнинг суверен ҳуқуқи сифатида тан олинган ва бу тўғри, чунки НАТОнинг Россия билан тўғридан-тўғри тўқнашувидан қочиш керак, деди Венгрия ташқи ишлар ва ташқи иқтисодий алоқалар вазири Петер Сийярто.
Сийярто биринчи кундан сўнг НАТОнинг Гаагадаги саммитининг якуний ҳужжатида Украинанинг альянсга "қайтмас йўли" ҳақида гап бўлмаслигини айтди.