ТОШКЕНТ, 9 июн – Sputnik. Олмалиқ кон-металлургия комбинати (ОКМК) Ўзбекистонда биринчилардан бўлиб замонавий 50х25 ўлчамдаги 2 та керн сақлаш омборини фойдаланишга топширди. Бу ҳақда комбинат матбуот хизмати хабар қилди.
Омбор жами 60 минг керн яшикларини сақлаш учун мўлжалланган. Керн сақлаш омборининг афзаллиги ва зарурлиги шундан иборатки, ҳар бир конни геологик ўрганиш мақсадида олинган керн намуналари бу кон ўрганилиб, қазиш ишлари тугагунга қадар сифатли сақланиши талаб этилади.
Введёно в эксплуатацию современное кернохранилище
© АО "Алмалыкский горно-металлургический комбинат"
Намуналарни сақлаш муддати 100 йилгача давом этиши мумкин. Сабаби олинган керн намуналарида бир неча босқичда геологик (минерология, петрография, гидрогеология), технологик ўрганиш ишлари такрор олиб борилиши мумкин.
Бунинг учун эса керн яшикларини сифатли сақлаш, қудуқ номларини ўчиб кетишини олдини олиш, керн яшикларини тартиб билан жойлаштириш зарур.
Таъкидланишича, комбинат геологлари томонидан ҳозирги вақтда мамлакатнинг 5 та вилоятларида жойлашган 20 тага яқин мис, олтин, кумуш, рух, қўрғошин, вольфрам, нодир металлар ҳамда норуда конларидан қазиб олиш ва геологик ўрганиш ишларини олиб боришмоқда.