ТОШКЕНТ, 11 май — Sputnik. Россия президенти Владимир Путин Киевга бевосита музокараларни қайта бошлашни таклиф қилди.
“Биз Киев расмийларига улар тўхтатиб қўйган музокараларни қайта бошлашни таклиф қиламиз”, — деди Путин ОАВга берган баёнотида.
Путиннинг аниқлик киритишича, гап тўғридан-тўғри музокараларни қайта бошлаш ҳақида кетмоқда. Улар ҳеч қандай шартларсиз амалга оширилиши ва кечиктирмасдан 15 май куни Истанбулда бошланиши кераклигини таъкидлади.
Владимир Путин Украина билан Истанбулда олиб борилган тўғридан-тўғри музокаралар чоғида узоқ муддатли ва барқарор тинчлик сари биринчи қадам бўладиган янги сулҳга эришиш мумкинлигини истисно этмади.
“Биз бу музокаралар давомида қандайдир янги сулҳлар, янги ўт очишни тўхтатиш ва нафақат Россия, балки Украина томони ҳам амал қиладиган ҳақиқий сулҳ ҳақида келишиб олиш мумкинлигини истисно қилмаймиз”, — деди Путин.
Владимир Путиннинг таъкидлашича, ҳақиқатдан ҳам тинчликни хоҳлайдиган ҳар бир киши Россиянинг музокаралар таклифини қўллаб-қувватлайди.
Россия Ғарбдаги ҳамкасбларига Москва Украинада Ғалаба куни эълон қилинган ўт очишни тўхтатиш режимини келажакда узайтириши мумкинлигини маълум қилди, деди Россия президенти.
“Биз учун муқаддас байрамда учинчи марта сулҳ эълон қилдик. Шу билан бирга, биз Ғарбдаги ҳамкасбларимизга... келажакда бу сулҳ шартларини узайтириш имкониятини истисно қилмаслигимизни айтдик. Лекин, албатта, бир неча кун ичида нима бўлишини таҳлил қилгандан сўнг”, — деди Путин.
28 апрель куни Владимир Путин Ғалабанинг 80 йиллиги муносабати билан ўт очишни тўхтатишни эълон қилди – 7-8 май ярим тундан 10-11-майга ўтар кечаси.