TOШКЕНТ, 5 май — Sputnik. Украинадаги можарони ҳал қилиш учун “жуда яхши” имконият бор. Бу ҳақда АҚШ президенти Дональд Трамп "NBC News" телеканалига берган интервьюсида маълум қилди, деб ёзмоқда РИА Новости.
“Менимча, бизда буни амалга ошириш учун жуда яхши имконият бор”, — деди у Украинадаги можарони ҳал қилиш истиқболлари ҳақида гапириб.
Шу билан бирга, Америка етакчиси томонлар ўртасида кўраётган “катта нафрат” туфайли Қўшма Штатлар тинч йўл билан келишувга эриша олмаслиги эҳтимоли борлигини қўшимча қилди.
Унинг қўшимча қилишича, Америка расмийлари Украинадаги можарони ҳал қилиш бўйича музокараларда бир томондан кўпроқ, иккинчи томондан эса камроқ муваффақиятга эришди.
Оқ уй раҳбари бунга қарамай, можарони ҳал қилиш бўйича келишувга эришишга умид қилаётганини тан олди.
Унинг таъкидлашича, Европа Иттифоқи давлат раҳбарлари ундан Украинадаги можарони ҳал қилиш учун Россия етакчиси Владимир Путинга қўнғироқ қилишни сўрашди, чунки Россия президенти гўёки уларнинг қўнғироқларига жавоб бермаган.
“Биласизми, Европа Иттифоқи етакчилари мендан кўп марта Путинга қўнғироқ қилишимни сўрашган, чунки у уларнинг қўнғироқларига жавоб бермаган”, — деди Трамп.
АҚШ президенти аввалроқ Россия можарони ҳал қилиш бўйича келишувга эришишга тайёр, аммо ҳозирча Киев билан келишувга эриша олмаганини айтган эди.