ТОШКЕНТ, 27 апр — Sputnik. Президент Шавкат Мирзиёев Эронда рўй берган портлаш муносабати билан президент Масъуд Пезешкиёнга таъзия мактуби йўллади, дея хабар берди давлат раҳбари матбуот котиби Шерзод Асадов ўзининг Telegram-каналида.
“Ўзбекистон Республикаси Президенти Шавкат Мирзиёев Эроннинг Бандар-Аббос шаҳридаги Шаҳид-Ражоий порти ҳудудида рўй берган портлаш оқибатида кўплаб инсонлар ҳалок бўлгани ва жиддий жароҳат олгани, катта талафотлар кўрилгани муносабати билан Президент Масъуд Пезешкиёнга таъзия мактуби йўллади”, — дейилади хабарда.
Давлат раҳбари вафот этганларнинг яқинларига сабр-тоқат ва бардамлик, жароҳат олганлар тез фурсатда шифо топишини тилади.
Маълумот учун, Эроннинг Бандар-Аббос портида ёқилғи сақланадиган резервуар ёниб кетиши оқибатида кучли портлаш содир бўлди. Эрон ОАВларига кўра, портлаш қурбонлари сони 25 кишига, жароҳатланганлар сони 1139 кишига етди. Портлашга ракета ёқилғиси сифатида ишлатиладиган натрий перхлорат сабаб бўлган.